Þessi vefur er kynning á PEEL-verkefninu.
Vefurinn er lokaverkefni mitt á námskeiðinu ,,Rannsóknir í skólastarfi" í KHÍ haustið 2006. Þar vaknaði áhugi minn á starfendarannsóknum og rannsóknum í skólastarfi (Teacher Research).
Á vorönn 2007 bætti ég svo námsmatshluta við þennan vef.
Ég er grunnskólakennari og er í seinni hluta mastersnáms í Kennaraháskóla Íslands.

Mér fannst mjög spennandi verkefni að tengja saman fræðin úr háskólanum og kennsluna í grunnskólunum. Sem kennari finnst mér reynslan vera sú að kennarar eru ekki nógu kunnugir þeim rannsóknum sem fram fara í háskólum um nám og kennslu. Í grunnskólum landsins eru ótal þróunarverkefni í gangi og kennarar eru að gera margt áhugavert og skemmtilegt sem þörf væri á að koma betur á framfæri.

PEEL-verkefnið byggir á hugmyndum frá kennurum um kennsluaðferðir og leiðir sem ganga vel í kennslu og námsaðferðir nemenda. Kennararnir hittast reglulega og ræða faglega um kennsluna og miðla hugmyndum sín á milli. Þeir skrá stuttar sögur um það sem vel gengur í kennslu og miðla þannig góðum hugmyndum til annarra kennara.

Gaman væri að búa til svipaðan gagnabanka og PEEL-kennarar hafa gert, með sögum íslenskra kennara. Þar kæmu fram ýmis verkefni og kennsluaðferðir sem íslenskir kennarar eru að prófa og þróunarverkefni sem eru í gangi víða í skólum landsins. Kennarar gætu þannig miðlað reynslu sinni og lært af öðrum kennurum.