Þetta verkefni reynir á samvinnu og hugarflug nemenda. Skilyrði er að hver hópur sé með sitthvort verkefnið og svo er verkefnunum skipt á milli hópa. Nafnið, heit kartafla (blaðið), er dregið af því að það er bara hægt að halda á heitri kartöflu í smá stund sem vísar til þess að verkefnið stoppar stutt hjá hverjum hóp.

1. Bekknum er skipt í nokkra hópa, 3-4 í hóp. Hver hópur fær blað og blýant.
2. Hver hópur eitt verkefni, þar sem leysa á eitthvað vandamál eða svara opinni spurningu. Spurningin er skrifuð efst á blaðið.
3. Hver hópur ræðir svo saman og skráir niðurstöður sínar á blaðið.
4. Eftir stutta stund er blaðið fært á þann hóp sem er vinstra megin.
5. Hver hópur les nýja verkefnið og svörin sem komin eru á blaðið. Þeir ræða saman og bæta við sínum hugmyndum og svörum á blaðið.
6. Þetta er svo endurtekið þangað til allir hóparnir hafa glímt við öll verkefnin.
7. Niðurstöðurnar er svo hægt að hengja upp á vegg og gera þær þannig sýnilegar þannig að hægt sé að nýta þær í fleiri verkefnum. Einnig er hægt að láta þann hóp sem fyrstur fékk verkefnið, taka saman niðurstöður og skila endanlegri skýrslu eða veggspjaldi þar sem fram koma niðustöður allra hópanna.