Þetta verkefni er hægt að vinna með nemendum á öllum aldri í ritun. Það hvetur til skapandi skrifa og eykur orðaforða nemenda. Verkefnið er unnið í hópavinnu og stuðlar þannig að umræðu um lýsingarorð, orðflokka og fjölbreytni tungumálsins. Nemendur eru hvattir til að nota sjaldgæf og frumleg orð og forðast algeng lýsingarorð eins og stór og lítill.

Verkefnið er unnið þannig:

1. Eftir að kennarinn hefur rifjað upp orðflokka, t.d. lýsingarorð, þá skrifar hann eina setningu upp á töflu, t.d. ,,Húsið var upp á hæðinni".
2. Þá ræðir kennarinn við nemendur um setninguna og hvaða orðflokkum orðin tilheyra.
3. Nemendum er svo skipt í fáa stóra hópa með því að númera nemendur 1, 2, og 3 (8 í hverjum hóp í 24 barna bekk).
4. Skiptið svo orðunum á milli hópanna þannig að t.d. hópur 1 fær orðið ,,húsið", hópur 2 orðið ,,upp" o.s.frv. Hver hópur fær blað þar sem þeir eiga að skrifa upp öll lýsingarorð sem þeim dettur í hug og tengjast orðinu þeirra. Allir þurfa að skrifa á sitt blað. Gefið 10 mínútur í þetta.
5. Næst er hópunum breytt þannig að í hverjum hóp fá allir númer frá einum uppí átta. Hópur 1 vinnur svo saman, hópur 2 o.s.frv. Þá eru komnir 8 nýir hópar og í hverjum hóp eru allar hugmyndirnar samankomnar úr hinni hópaskiptingunni.
6. Nú eiga allir hóparnir að skrifa 5-7 setningar um húsið á hæðinni og nota þau orð sem þau hafa frá öllum í hópnum. Gefið 15-20 mínútur í þessa vinnu.
7. Að lokum lesa hóparnir upp sínar setningar og deila þeim með öðrum nemendum.

Nemendur hafa gaman af skapandi skrifum og þetta verkefni krefst samvinnu og að nemendur hlusti á aðra og geti miðlað sinni þekkingu til annarra nemenda.