Margir nemendur eiga erfitt með að undirbúa sig fyrir próf og nota ekki þann tíma sem þeir hafa til að lesa og læra fyrir prófið. Þeir eiga erfitt með að greina aðalatrið úr lesefninu og vita ekki hvernig þeir eiga að undirbúa sig fyrir próf vegna þess að þeim hefur ekki verið kennt það. Hér er ein aðferð við að kenna nemendum að lesa fyrir próf.

Í síðasta tímanum fyrir próf fer kennarinn yfir efnið (blaðsíður eða kafla) með nemendum og spyr þá hvað sé mikilvægast í þessu efni. Það er skráð á töfluna svo að nemendur geti lært hvernig á að glósa og finna út aðalefnið. Á meðan kennarinn skrifar eiga nemendur að fylgjast vel með og ekki skrifa upp eftir kennaranum. Kennarinn ræðir við nemendur um hvers vegna þetta séu aðalatriðin og kennir þeim þannig að skrifa glósur.

Í lok tímans eru glósurnar þurrkaðar út af töflunni og nemendur fá það sem heimavinnu fyrir prófið að skrá niður aðalatriðin úr kaflanum á A4-blað. Þeir eiga að koma með það í prófið og það gildir sem hluti af einkunn á prófinu, t.d. 10%

Þannig læra nemendur að glósa og finna út og skrá aðalatriðin og hversu mikilvægt er að nota tímann rétt þegar lært er fyrir próf. Þeir læra líka fljótt mikilvægi þess að hafa góðar glósur og ekki er verra að geta hækkað einkunnina á prófi með því að skila góðum glósum þegar þær gilda sem hluti af einkunn.