Veggspjöld eru oft afrakstur hópavinnu og notað sem hluti af námsmati þar sem hópurinn rannsakar eitthvað viðfangsefni og kynnir svo niðurstöðuna munnlega. Þessi aðferð hefur nokkra kosti, m.a. að hóparnir fá mismunandi verkefni sem þeir svo kynna fyrir öðrum nemendum og þeir þurfa að velta fyrir sér hvernig þeir ætla að koma vitneskjunni og niðurstöðunum til skila þannig að það verða öðrum nemendum til gagns. En nemendur eru ekki þjálfaðir kennarar og gallinn er oft sá að nemendur hafa takmarkaðan skilning og getu til að koma efninu nógu vel til skila þannig að hinir nemendurnir hafi gagn af. Annar galli er sá að þeir eru ekki nógu færir í að velja atriði sem eru áhugaverð og viðeigandi.

Ein leið til að eiga við þessa galla er að sjá til þess að veggspjöldin innihaldi spurningar sem koma frá öðrum nemendum.

Vinnuferlið er þannig:

1. Nemendur rannsaka og klára veggspjaldið sitt.
2. Öll veggspjöldin eru hengd upp á vegg með auðu ,,spurningablaði" við hvert veggspjald.
3. Nemendurnir ganga um stofuna með sínum hóp og skoða veggspjöldin. Við hvert veggspjald skrifa þeir 2-3 spurningar sem þeir vilja fá svör við (varðandi efnið á veggspjaldinu). Þeir þurfa að setja a.m.k. eina spurningu af hvorri tegund spurninga, (a) eitthvað sem er ekki alveg ljóst af veggspjaldinu: Er þetta....? Hvað er....? og (b) spurningu sem eykur skilning þeirra á viðfangsefninu: Hvað ef....? Hvað gæti gerst ef....?
4. Hver hópur tekur saman spurningarnar á sínu veggspjaldi og notar þær við undirbúning kynningarinnar. Kennarinn getur aðstoðað þá við að flokka spurningarnar og setja saman þær spurningar sem eru sambærilegar.
5. Í kynningunni lesa hóparnir spurningarnar sem þeirra hópur fékk og fjalla eingöngu um það efni sem bekkjarfélagar þeirra vildu vita eitthvað um. Allir í hópnum eiga að taka þátt í að svara spurningunum. Það er allt í lagi þó að þeir geti ekki svarað öllum spurningunum, þeir varpa þeim þá út í bekkinn. ,,Veit einhver svarið við þessu"? Nemendum finnst oft mjög gaman að svara slíkum spurningum og góðar umræður spretta upp. Stundum er viðeigandi að kennarinn aðstoði, en þær upplýsingar koma þá fram vegna áhuga og viðbragða frá nemendum.