Þessi saga segir frá hugmynd um að efla samræður nemenda og að auka skilning þeirra á viðfangsefninu. Markmiðið er að nemendur hlusti vel á framsögn bekkjarfélaga og geti svarað spurningum þeirra um efnið.

Nemendur eiga að velja sér grein í tímariti (t.d. Lifandi vísindi), lesa hana vel og undirbúa 3-5 mínútna ræðu eða framsögn um efnið. Einnig eiga þeir að skrifa niður fjórar spurningar (ekki of erfiðar) um efnið sem þeir ætla að spyrja nemendur í lok kynningarinnar. Tilgangurinn með því er að fá aðra nemendur til að hlusta vel á innihald kynningarinnar. Nemandinn á svo í lokin að spyrja bekkjarfélagana spurninga úr efninu. Þeir skrifa niður svörin og nemandinn tekur svo svörin og fer yfir þau heima.

Eitt stig er gefið fyrir hvert rétt svar og stigin eru svo talin þegar nemendurnir afhenda bekkjarfélögunum úrlausnirnar. Svörin eru rædd og ,,eigandi" spurninganna gerir grein fyrir réttum svörum.

Reynsla PEEL-kennara sýndi að nemendum fannst þetta spennandi og þeir hlustuðu vel á bekkjarfélagana. Sumir skrifuðu glósur á meðan á kynningunni stóð og athyglisvert var að sumir flytjendurnir lögðu áherslu á svörin á meðan þeir töluðu.

Önnur útfærsla:
Hægt er að láta nemendur gera spurningar um álitamál úr efninu. Til dæmis spurningar sem innihalda ekki bara staðreyndir heldur skoðanir eða viðhorf.